Umusifuzi Uwikunda Samuel yarezwe na Zamalek muri CAF.

Umusifuzi w’Umunyarwanda, Uwikunda Samuel, uri mu basifuzi bemewe n’Impuzamashyirahamwe ya Ruhago muri Afurika (CAF) bayobora imikino ya CAF Confederation Cup 2025/2026, yarezwe na Zamalek SC yo mu Misiri.

Zamalek SC yakinnye na Kaizer Chiefs mu mukino wabaye ku wa 29 Ugushyingo 2025 mu gihugu cya Afurika y’Epfo. Uyu mukino warangiye amakipe yombi anganyije igitego 1–1.

Ni umukino w’umunsi wa kabiri mu itsinda D. Nubwo Zamalek iri ku mwanya mwiza, ntabwo bishimiye uko uyu mukino wasifuriwe. Zamalek ivuga ko yimwe igitego cyemewe, ikakwa penaliti itahawe, ndetse igahabwa amakarita itari akwiye.

Iyi kipe yo mu Misiri isaba ko imikino ikomeye nk’iyi yakoresha abasifuzi bafite uburambe buhagije, ndetse guhera mu mikino iri imbere hakajya hifashishwa ikoranabuhanga rya VAR, rizafasha kugabanya amakosa yo gusifura.

Mu itsinda D harimo amakipe ane ariyo Al Masry SC yo mu Misiri, Zamalek SC, Zesco United yo muri Zambiya, ndetse na Kaizer Chiefs. Kugeza ubu, itsinda riyobowe na Al Masry ifite amanota atandatu (6) nyuma yo gutsinda imikino ibiri. Zamalek irayikurikira n’amanota ane (4), naho Zesco United iri ku mwanya wa nyuma n’amanota zeru (0).

Mutoni Divine / African Updates